إسم الأغنية: لو كان الواقع لوحة

كل مغاربة لي فلكون....السلام عليكم
المتمرد حتى لكفن ييه...معكم مسلم
واش آعشيري...تخيل معيا الواقع فحال شي لوحة وأنا الرسام
تخيل معيا شني نقدر نرسم آلخوا ديالى
ييه

لوكان الواقع لوحة لو كنت أنا الرسام
نرسم بكل الألوان نرسم كل الأحلام
نرسم من طنجة حتى لڭويرة كلشى هايز لعلام
نرسم بلادي زادت ألف خطوة نلقدام
نرسم شحال من مدرسة أطفال في يدم لقلام
كولشي قاري و خدام ....الأمية غير أوهام
البطالة غير كلام ف لسان الناس لقدام
لاسرقة لا إجرام...الوقار ولإحترام
نرسم سبطرات كبار دلعيين فكل مكان
دكاترة بزاف والشعب يتداوا بالمجان
نرسم البرلمان وناس فيهم الأمان
خدمين نهار وليل باش أنا نعيش مزيان
نرسم ولد الدريوش يقري مع ولد فلان
ولفرق لكين بينتم نوقاط دلإمتيحان
نرسم عيون بلا دموع وقلوب بلا أحزان
نرسم و نزيد نرسم مادام عندي الألوان


نرســـــم نهار وليل...نرســــم أحـــلامــي ألوان تسيل
حـتي إذا كان لـون قلـيل... نرسم بـدمي حـتي نـآخر ميـل


نرسم أخر طفل خرج من دار اليتامة
شبرين فيدو ناس رسمو على وجهو الإبتسامة
نرسم أخر طفلة كانت فالديور خدامة
ودابا في يدا الكتوب ومشيا تقرا بكل كرامة
ونرسم شوارع كبار...فضاآت لي الترفيه
فكل حومة نرسم ملعب ودراري يلعبو فيه
نرسم كورنيش طويل بلا كزينو وبلا بار
نرسم شحال من جامع مفتوح ليل ونهار
نرسم بنت بلادي سترة راسة بالحجاب
نرسم شاب ناوي الخير قاصد الباب
نرسم طريق ما فيها زبل وما فيها حفاري
نرسم مواطن غير طاح والإسعاف ماجي جاري
نرسم درويش خارج من السوق بالقوفة عامرا
راجاع ندارو يضحك الباراكة باقا حاضرا
نرسم المسكين خلص الضاو والماء وخرج نشطان
ونرسم جار فرحان حيت جارو بات شبعان


نرســـــم نهار وليل...نرســــم أحـــلامــي ألوان تسيل
حـتي إذا كان لـون قلـيل... نرسم بـدمي حـتي نـآخر ميـل


نرسم حوانت نلي رزقوا مفرش غير فالأرض
ملاجئ نلي ناعس فالبرودا ومغاطي بالبرد
نرسم ديور نلي باقي ساكنين غير فالبرارك
نرسم مشروع نلي باقي يفكر يمشي حارك
نرسم مدير د الحبس مهلي فالحباسا
مسجون فيدو ديبلوم فالمجتمع عندو بلاسا
نرسم فكل الحوام سبيطار للمدمنين
نرسم المحسنين يعطيو حق المساكين
نرسم ناس من جميع الفئات كولشي ماشي يصوت
نرسم المضلوم يرجعلوا حقو بلا ميغوت
نرسم موظف عادي قادر يعيش أسرة
ونرسم الزبال يتخلص أحسن أجرة
نرسم مغربي مغرب وعندو المغرب فالدم
نرسم بلادي معولا على لي باغي يخدم
ونرسم رسام راسم راسو يحلم بلي بلادو لوحة وباغا لي يرسم


نرســـــم نهار وليل...نرســــم أحـــلامــي ألوان تسيل
حـتي إذا كان لـون قلـيل... نرسم بـدمي حـتي نـآخر ميـل

للمزيد من الفيديوهات

http://www.vimeo.com/tzsamir

http://www.youtube.com/TheEmigro