فضيحة جديدة للخطوط #الجوية #التونسية : صام منصور
هامّ جدّا هامّ جدّا
عاونوني يرحم والديكم راهي بلادنا باش تمشي في هاوية وأحنا نتفرّجوا، باش نحكيلكم حكاية وكان تعملوا مزيّة إلّي عندو واحد في اللّيستة متاع الكونتاكت متاعو يبعثلو فمّاش ما توصل الحكاية لمن يهمّه الأمر، وسّعوا معايا بالكم وأسمعوني.
آنا مواطن تونسي مقيم بالخارج وبالتحديد في لندن، عندنا مدّة توّة مع جماعة صحاب وأحباب نعملوا في إشهار لبلادنا كعمل تطوّعي وما عندنا حتّى غرام مزيّة بالعكس نشاءالله نرجّعوا 1% لتراب بلادنا الغالية... نشوفو في الوتلا وفي الرحلات الجوية وننصحوا الناس وين يمشيو فمّاش ما تتحرّك السياحة شويّة والناس تاكل الخبز مع أنّو أصحاب النزل وخاصّة تونس الجوية ماهومش عاملين حتّى مجهود للتشجيع على الجيّان يعني مثلا كي تشوف ظروف بلادنا وتقارن جمعة في تونس مع جمعة في البرتغال ولاّ إسبانيا وإلاّ اليونان أو.... تلقاها تونس أغلى ببااارشا وباطبيعة النّاس ميجويش لأنّو خاصّة التذكرة مهيش competitive فضلا عن أسباب أخرى منها الخدمات والتنشيط والترفيه و..و..و.. وإمشيو حلّو tripadvisor وشوفوا... باهي أيّا شهرين لتالي الوزير الأوّل عمل مجلس وزاري وتقرّر باش نشجعوا المقيمين بالخارج والأجانب على زيارة تونس ونشّطوا الموسم السياحي تقرّر 30% تخفيض في الرحلات الجوية والبحرية والحكاية في الأخبار والجرائد والإنترنيت وأحنا لهنا نفيّشوا وندزّوا في صدورنا ونورّيو في الأنقليز كيفاش قاعدين نعملوا باش نتطوّروا... أيّا دخلنا للــwebsite متاع التونيسير ملقينا حتّى أثر للــ30% والتساكر سومها ماشي ويزيد والناس (حوالي 40 رقبة) يستنّاو حاسيلوا السّوم وصل للـ400 إسترليني معناها 1200 دينار،التسكرة بركة راهو علما أنّو Ibiza بـ144 إسترليني، برشلونة 170، مدريد 166 ، لشبونة 167، بورتو 180 كورفو 176، كريت 194..... أدخلوا على www.skyscanner.net وشوفو بعينيكم من 19 جويلية إلى 1 أوت. أيّا سيدي كلّمت tunisair في مطار هيثرو نسيت قدّاش من مرّة حتّى حدّ مايهز التليفون! كلّمت البيرو متاعهم في وسط البلاد قالولي هاذوكم الأسوام صحاح وراهو ماجانا شيء عالـ30% !!! يا جماعة راهو قرار مجلس وزاري! قالّك ما جاتناش تعليمات! أيّا هزّيت التليفون وكلّمت وزارة النقل... نهارين وأنا نحاول حتّى حدّ ميجاوب،! Tunisair في تونس service clientelle حتّى حدّ ميجاوب! وزارة السياحة حتّى حدّ ميجاوب!الوزارة الأولى حتّى حدّ ميجاوب! علاش هكّة؟ علاش تحبّو تحطّمونا؟ نلقى نومرو متاع relation publique كلّمتو، جاوبني واحد ولد حلال نتحفّظ على إسمو في الوقت الحاضر أما عندي نومروه والإيمايل إلّي بعثهولي، حكيتلو لحكاية قعد حالل فمّو وقالّي يا خويا رانا خدمنا عالـ30% وعملنا كلّ شيء قتلوا برّه شوف الأسوام وهاو نومرويا كلّمني كان تحبّ وشوفني نقول في الحقّ وإلاّ لا، السيّد هذا كان عند كلمتي ورجعلي وقالّي يا خويا سامحنا وأمسحها فيّا رانا نقاسيو مل imcompetence وراني كلّمت madame x عالـservice clientelle وهي في بالها بيهم إلّي ماهومش يخدمو كيما يلزم وقاعدة إتبّع فيهم، قالي راهو ملقيتش الــ30% أما هاني باش نحلّ تعريفة أرخص عالأقلّ تبدا competitif مع البلدان الأخرين وكلّمهم هاني بعثتلهم code قبل ما يمشيو! أياّ هذاكا إلّي صار وأعملنا الحجز وخلّصنا....... أيّا سيدي جات حكاية سوسة والدمّ للركبة طاح كلّ شيء في الماء فمّا ناس بطّلوا خاطر خايفين ... مع هذا الكلّ ماهبّطناش يدينا وباقي نجريو على بلادنا ونقولوا راهو الإرهاب ماعندوش بلاد وينجّم يضرب في كلّ بقعة وفمّا ناس تشجّعت وقالوا نمشيو ونزورو البقعة متاع l'attentat كحركة تحدّي للإرهاب وزدنا فرحنا كيف البارح وزيرة السياحة قالت 30% عالتساكر مرّة أخرى وإلغاء معلوم طابع الخروج عالسياح (إلّي هو أصلا إجراء أحمق)..... يا ناس يا عباد ربّي الحكاية هي بيدها تعاودت وTunisair قالّك ما جانا شيء وعدّاوني لوحدة مسؤولة قاتلي بكلّ صحّة رقعة haute saison !!! مازالت تحكي على haute saison! قلتلها يا بنتي راهو مايجيش عملتو market evaluation جديدة عملتو risk assessment جديد عملتو Urgent business plan قاتلي أه شنوّة وبدات تورور، منكذبش عليكم علّقت عليها... كلّمت وزارة النقل كالعادة مجاوب حدّ، الوزارة لوّلة ما جاوب حدّ، وزارة السياحة جاوبوني حكيتلهم عدّاوني لوحدة في direction generale إلّي قاتلي أتو نوصّل كلامك الكلّ وإنت زيد حطّ شكايتك في مكتب العلاقات مع المواطن وخذات إسمي ونومرويا وطاح الكاف على ظلّو.
هاذي الحكاية ممكن برشة منكم متهمّوش أما برشا متأكّد إلّي باش تهمّهم كيما يهمّني آك الألاف إلّي يستقاتو السياحة يصوّرو في خبزة في الشهيلي من مولا لوتيل لبياع الكاكي، يهمّني بلادي تتقدّم وتتطوّر، يهمّني المسؤولين عالخور هذا يتحاكموا عالخيانة العظمى لأنّو هذا زادا إرهاب كي تخون بلادك وما تخدمهاش.
إلّي يعرف شكون وصّلوا الميساج وبرتاجيو حبّا في بلادكم ماكانش نولّيو لكلّنا خونة وإلّي يحبّ يتصل بي ينجّم يبعثلي ميساج.شكرا.