Nisma e LSDM-së për debat mbikëqyrës rreth prezumimit të pafajësisë dhe masës së paraburgimit mori dritën jeshile nga anëtarët e Komisionit për sistem politik. Gjatë shqyrtimit të kësaj nisme Vesna Bendevska nga LSDM-ja theksoi se prezumimi i pafajësisë po shkelet në masë të madhe, edhe pse bëhet fjalë për një të drejtë të garantuar me kushtetutë. Sipas saj, paraburgimi po shfrytëzohet si vegël e pushtetit ndaj atyre që mendojnë ndryshe! Ndërkohë nga VMRO DPMNE-ja, ndonëse mbështesin nismën, kërkojnë që Kuvendi të mos vihet mbi pushtetin gjyqësor.

"Askush në bazë të kushtetutës nuk mund të shpallet fajtor para se procesi gjyqësor të bëhet i plotfuqishëm. Kushtetuta parashikon gjithashtu 180 ditë si afat kur një person mund të qëndroj në paraburgim. Në Republikën e Maqedonisë ekzistojnë raste kur kohëzgjatja e paraburgimit shkelet në rekord botëror. Ne akoma kemi persona që qëndrojnë nga 1-2 vjet në paraburgim", deklaroi Vesna Bendevska, LSDM.

"Do të kujtoj se instrument i vetëm përmes të cilit kuvendi mundet të ndikojë ndaj pushtetit gjyqësor, është ndryshimi i ligjeve. Pra, kuvendi nuk mundet dhe nuk guxon të jap kahe, apo ta urdhërojë pushtetin gjyqësor. Në rast se Kuvendi e bënë atë, atëherë në të njëjtin moment, ne si deputet e kemi varrosur kushtetutën e vendit dhe kemi shkelur të gjitha dispozitat që garantojnë ndarjen e pushtetit. Për këtë shkak apeloj që të mos e shndërrojmë parlamentin në një huazo-gjykatë dhe të mos e shndërrojmë kuvendin si gjykatë ndaj të gjitha gjykatave", u shpreh Ilija Dimovski, VMRO-DPMNE.

Nisma u mbështet edhe nga BDI-ja e Ahmetit, të cilët vlerësojmë se çështja e paraburgimit dhe e prezumimit të pafajësisë janë çështje që kanë të bëjnë me liritë dhe të drejtat e njeriut.

"Janë të drejta fundamentale të të drejtave të njeriut të garantuara me konventën evropiane, të garantuara me Kushtetutën e RM-së dhe të garantuara me ligjet e RM-së. Këtë debat ne e mbështesim dhe presim që nga debati mbikëqyrës të krijohet një pasqyrë më reale për nivelin e respektimit të lirive dhe të drejtave të njeriut", tha Suzana Saliu, BDI.

Sipas rregullores së punës së Kuvendit, debati mbikëqyrës duhet të zhvillohet pas 15 ditësh. Bedri Rexhallari