TIRANË - Një aksident mes 4 makinave ka ndodhur pak minuta para orës 15:00 në hyrje të zonës së Kombinatit në Tiranë. Lajmi është bërë i ditur nga burime të Policisë së Tiranës që kanë mbërritur në vendin e ngjarjes. Nga aksidenti i ndodhur pranë servis "Xha Bafti" mësohet se kanë mbetur katër persona të plagosur dy prej të cilëve janë rëndë. Ata janë dërguar në Spitalin Ushtarak. Pas aksidentit, ka filluar zënka edhe mes personave që ndodheshin në katër makinat e përfshira. Policia e komisariatit numër 6 në kryeqytet, që ka mbërritur në vendngjarje, ka nisur hetimet për shkaqet e aksidentit, ndërsa ka nisur hetimet edhe për sherrin. Shkak fillestar i aksidentit dyshohet se është shpejtësia. Pas hetimeve të para policia ka arrestuar dy prej drejtuesve të mjeteve si shkaktarë të aksidentit dhe grindjes mes dy palëve. Policia ka bllokuar edhe dokumentet e makinave të aksidentuara; tip Skoda me targë AA 679 AP, Opel me targë TR 5443 F, Fiat me targë TR 5101 P, dhe një automjet Volkswagen me targë AA 114 AZ . Pas aksidentit është bllokuar ndërkohë edhe rruga ku ka ndodhur ngjarja për shkak të hetimeve.

(a.ç/shqiptarja.com)