Subscribe në Ora News këtu http://bit.ly/1s5j7UT

Pas reshjeve intensive të së dielës, situata në Vlorë vijon të jetë e rënduar. Katet e para të pallateve në lagjen ?Pavarësia?, ?24 Maji? dhe 15 tetori vijojnë të jenë nën ujë, ndërkohë që janë me dhjetëra biznese të dëmtuara.
Rrugët lidhëse të Vlorës vazhdojnë të jenë nën ujë, ndërkohë që janë hequr inertet dhe është hapur rruga Vlorë-Orikum.
Sipas të dhënave nga prefektura e Vlorës, 16 banesa në qytet, janë në ujë.
Situata problematike paraqitet dhe në Selenicë, ku nga dalja prej shtrati e lumit Vjosë, janë të paktën 7 fshatra të përmbytur, ndërkohë që uji ka hyrë dhe në banesa, apo biznese të zonës.
Në Fier nga dalja prej shtratit e Gjanicës, u përmbytën të paktën 550 banesa dhe 150 biznese përgjatë lumit.
Përfaqësues të Shtabit të Emergjencave raportojnë se prurjet e lumit janë më të mëdha se vitet e tjera duke qënë kërcënim serioz për përmbytjet më masive.
Mosfunksionimi i hidrovorëve si pasojë e mungesës së energjisë elektrike gjatë natës, ka ndikuar për përmbytjet.
Në Qarkun e Korçës, moti i keq ka krijuar probleme në disa zona. Sipas prefektit Ardit Konomi, Rruga Korçë-Ersekë, është vetëm me një kalim pasi përgjatë këtij aksi janë grumbulluar rreth 2 mijë m3 baltë e inerte, ndërsa 280 dele janë mbytur nga dalja e përroit.
Në Pogradec, lumi Vërdovë ka përmbytur disa banesa e biznese në të dy anët e tij, ndërsa vazhdojnë përmbytjet ndonëse po punohet për heqjen e ujit me 4-5 pompa. Prurjet kanë vazhduar gjatë gjithë orëve të para të së hënës.
Në Korcë, janë të bllokuara rrugët drejt Panaritit, Mesmalit e Moglicës, fshatra që kanë dhe ndërprerje të shpeshta të energjisë si pasojë e motit të keq.
Në Elbasan, prurjet e mëdha të shkumbinit, shkatërruan një pjesë të argjinaturës së përroit të Zaranikës.

Për më shumë klikoni në http://www.oranews.tv/vendi/nje-dite-pas-permbytjeve-ja-situata-ne-vlore-fier-korce-pogradec-e-elbasan/