http://www.vizionplus.tv
https://facebook.com/VizionPlusTV
https://twitter.com/VizionPlusTV
Pas dy ditësh mbërrijnë në Shqipëri përgjigjet përfundimtare të lëndës së sekuestruar në Xibrakë të Elbasanit. Në një kohë që Prokuroria kritikoi laboratorin e policisë shkencore mbi ekspertimet e ngjarjeve kriminale, edhe për drogën e sekuestruar hetuesit presin përgjigje nga ekspertë të huaj. Burime pranë organit të akuzës thanë se pritet të vijnë nga Gjermania përgjigjet mbi mostrat e sekuestruara e lëndës së lëngshme nga e cila dyshohet se përftohej kokaina. Nga hetimet paraprake deri më tani hetuesit kanë vetëm 18 kilogramë kokainë të pastër pas arrestimit në flagrancë të Ilir Hysenit i dyshuar si organizator në rrjetin e trafikut të drogës me origjinë nga Amerika e Jugut. Ndërkohë është bere pjesërisht verifikimi mbi pasuritë e të arrestuarve. Gjatë kontrolleve në banesën e Kelmend Dalipit policia gjeti rreth 30 mijë euro në kasafortë, por kjo shumë sipas hetuesve vinte nga një prej aktiviteteve private që zotëron Dalipi. I arrestuari pretendon se magazinat janë në pronësi të tij dhe ia ka dhënë me qera një tjetër personi nga Berati për të cilin policia nuk ka asnjë informacion. Nga ana tjetër sipas prokurorisë nga verifikimet e para të llogarive bankare asnjëri prej tyre nuk kishte shuma të mëdha të depozituara në bankë.