Ben Çami, i arrestuar në shkurt të këtij viti si bashkëpunëtor në trafikun e mbi 500 kilogramë kanabis përmes Kapshticës, rezulton i dënuar edhe në Itali me 10 vjet burg për akuzën e pjesëmarrjes në organizatë kriminale për trafikun e lëndëve narkotike.

Lufti Shabani, i njohur si Ben Çami ndodhet aktualisht në burgun 313 në Tiranë në masën e sigurisë të "arrestit me burg" për drogën e kapur në Shqipëri, ndërsa këtë të mërkurë efektivët e policisë i kanë komunikuar në qeli urdhër-arrestin ndërkombëtar e lëshuar nga autoritetet italiane.

Ben Çami u arrestua gjatë një operacioni të zhvilluar më 26 shkurt të 2016-ës, në Pikën e Kalimit Kufitar të Kapshticës, pasi gjatë kontrollit të ushtruar nga Shërbimet e Policisë Kufitare në mjetin tip ?MAN? kamion, me drejtues Eldi Zahiri, 38 vjeç, banues në Durrës, (i arrestuar), u gjet dhe u sekuestrua rreth 574 kg lëndë narkotike e dyshuar e llojit Cannabis Sativa.

Nga veprimet e para hetimore rezultoi se ky shtetas ishte bashkëpunëtor në këtë trafik së bashku me drejtuesin e kamionit dhe një persona tjetër, Janaq Koçeli të arrestuar po gjatë këtij operacioni.