http://www.vizionplus.tv
https://facebook.com/VizionPlusTV
https://twitter.com/VizionPlusTV
Në mungesë te automateve elektronike nëpër karburante, policia ka kërkuar nga kompanitë, qe të ruajnë ambientet me roje private dhe jo me punonjës turni. Kërkesa është bërë nga Policia e Tiranës, pas numrit të shtuar të ngjarjeve kriminale ne keto biznese. Vetëm gjatë dy muajve tetor - nëntor u regjistruan 9 grabitje të tilla, ndërsa pa kaluar 24 orë nga vjedhja me dhune në Lezhë, një tjetër pikë ra pre në Durrës. Krimi ndodhi tek Ura e Dajlanit ku persona të maskuar thyen derën e biznesit dhe vodhën nga kasaforta 150 mijë lekë si dhe disa tollona. Për policinë zbardhja mbetet e vështirë, pasi grabitësit nuk janë fiksuar nga kamerat e sigurisë. Të gjitha ngjarjet janë shoqëruar me dhunë, madje në Sarandë më 6 nëntor një punonjës i pikës humbi jetën pasi u qëllua nga grabitësi Arqile Koci. E njëjta skemë përdorej dhe nga ish punonjësi i Gardës Geraldo Guci. Nga 6 grabitje të ndodhura në muajin tetor, 4 prej tyre u kryen nga 21-vjeçari, i cili terrorizoi bizneset në zonat e kryeqytetit Durrësit dhe Krujës. Me atë të një arme lodër i riu kërcënonte punonjësit dhe merrte xhiron e turnit. Nga 171 pika karburanti të grabitura ne 5 vite, policia ka zbuluar vetëm 40% të rasteve.