Zona bregdetare e Shëngjinit është çliruar nga mbetjet e shumta të akumuluara gjatë stinës së dimrit. Frekuentimit të kësaj zone turistike nga vizitoret për shkak të rritjes së shpejtë të temperaturave i ka paraprire me ndërhyrje Njësia Administrative. Punonjësit e pastrimit sëbashku me nxënësit e shkollave, kanë ndërhyrë duke pastruar të gjithë vijën bregdetare.

Kreu i Njësisë Administrative të Shëngjinit Tonin Uldedaj ka garantuar të gjithë pushuesit dhe vizitoret që do të frekuentojnë Shëngjinin, se do të gjejnë një pastërti shembullore.

"Duke marrë shkas nga rritja e temperaturave, kemi nisur një aksion të gjerë duke kontrolluar të gjithë vijën bregdetare të Shëngjinit, për t'i paraprirë sezonit turistik. I garantojmë të gjithë pushuesve që do të frekuentojnë këtë bregdet kaq të bukur, ku ambientet ku ata do të kalojnë pushimet verore do të jenë të një niveli shumë të lartë dhe pasur", u shpreh Uldedaj.

Zona bregdetare e Shëngjinit ka nisur të frekuentohet nga vizitoret kryesisht gjatë fundjavave, ndërsa nga sot ky bregdet do të ketë një pamje tjetër e kjo do të vijojë gjatë gjithë sezonit turistik.