Vazhdon përplasja mes Presidencës dhe Ministrisë së Jashtme. Të hënën ministri i Jashtëm, Ditmir Bushati deklaroi në Komisionin e Jashtëm Parlamentar se kishte njoftuar zyrtarisht me një shkresë Presidentin e Republikës për votimin e Shqipërisë në Asamblenë e Kombeve të Bashkuara për armët bërthamore.

Ndërsa Presidenca reagoi duke e quajtur të pavërtetë deklaratën. Por ministri jashtëm këmbënguli edhe sot duke mbajtur te njëjtën linje.

Pas kësaj deklarate, presidenca reagoi serish duke publikuar edhe protokollin e marrjes në dorëzim të përgjigjes së Ministrisë së Jashtme për kërkesën e Presidentit te Republikës.

Ky dokument vërteton se përgjigjja zyrtare i është dërguar Presidencës vetëm sot, pra me 7 shkurt, në orën 10.00.

Shkresa me numër protokolli 1662 është dorëzuar në Gardën e Republikës nga korrieri i Ministrisë së Jashtme, Julian Janaqi dhe pak minuta më vonë është marrë në dorëzim nga strukturat e protokollit të Institucionit të Presidentit.

Presidenti Bujar Nishani, në reagimin e tij shpreh keqardhjen për disinformimet e përsëritura e të pavërteta të Ministrit të Jashtëm, Ditmir Bushati.

Ai thekson se nëse nuk do të ishte një çështje e rëndësishme e marrëdhënieve me Shtetet e Bashkuara të Amerikës, aleatin kryesor strategjik të Shqipërisë, si dhe vendet partnere në NATO, nuk do t?i kthente përgjigje disinformimit të radhës së Ministrit.

Tv Klan