Ambasadori i Bashkimit Europian në Shqipëri Luigi Soreca nga Fieri ku mori pjesë në një aktivitet ka folur për aktualitetin politik, vrasjen e ekstremistit grek, por edhe dorëheqjen e Fatmir Xhafajt nga posti i Ministrit të Brendshëm. Duke u ndalur te ngjarja në Bularat, ai kërkoi mbrojtjen e pakicave minoritare, ndërsa theksoi se dy vendet duhet të arrijnë një marrëveshje për rrugëtimin e Shqipërisë në BE, referuar negociatave për dosjet e vjetra, mes tyre kufiri detar.

Marrëdhënia mes Shqipërisë dhe Greqisë është natyrisht çështje dypalëshe. Është me rëndësi për ne si BE, që Greqia dhe Shqipëria të gjejnë një marrëveshje për rrugëtimin e Shqipërisë në BE. Është e rëndësishme që pakicat në Shqipëri të mbrohen.

Luigi Soreca
Ai vlerësoi punën e Fatmir Xhafajt në krye të Ministrisë së Brendshme, ndërsa tha se mbështetja e BE-së për Shqipërinë në luftën kundër krimit dhe korrupsionit do të vijojë.

Gjatë muajve të fundit Ministria e Brendshme ka marrë disa aksione të rëndësishme dhe në krye ka qenë ministri Xhafaj. Ndaj vlerësimi unë për ministrin është mjaft i qartë. Ne shpresojmë që ministri i ri do të vijojë luftën kundër krimit dhe korrupsionit. Ne presim që kjo gjë të ndodhë. Ata që do të luftojnë krimin dhe korrupsionin do të kenë në krah BE-në.

Luigi Soreca