भाजपचे राज्यसभेचे खासदार उदयनराजे भोसले आणि आमदार शिवेंद्रराजे भोसले पुन्हा एकदा समोरासमोर आले आहेत. शिवेंद्रराजे यांच्या ताब्यातील अजिंक्यतारा कारखान्यात भ्रष्टाचार झाल्याचा आरोप उदयनराजे यांनी केला आहे तर आमदार शिवेंद्रराजे यांनीही याला प्रत्युत्तर देत खासदार उदयनराजे यांची बुद्धी भ्रष्ट झाल्याचं म्हटलं आहे. उदयनराजेंनी कधीही उसाची शेती केली नसून ते फक्त डोंबाऱ्याचा खेळ करत आहेत, असा टोला शिवेंद्रराजेंनी हाणला आहे. साबळेवाडी येथील एका कार्यक्रमात बोलताना उदयनराजे यांनी शिवेंद्रराजेंवर तोफ डागली. 'छत्रपती घराण्याचा वारसा सांगताना महाराजांचे आचारविचार आचरणात आणून जोपासले पाहिजेत. चांगल्या लोकांवर भ्रष्टाचाराचे आरोप करीत बदनाम केले जात आहे. लोकांचे जीवनमान उंचावण्यासाठी सरकारी संस्था स्थापन केल्या जात आहेत. कारखान्यांमधील शेअर होल्डर हा प्रत्येकजण कारखान्याचा मालक आहे. ही कोणाचीही खासगी मालमत्ता नाही. कारखान्याच्या नावाखाली चाललेला अतिरेक हा कुठेतरी थांबवला पाहिजे. कारखाना हा लोकांच्या कष्टावर उभा केलेला आहे. कारखान्याच्या माध्यमातून अनेक प्रकारचा भ्रष्टाचार झाला आहे आणि तो वेळ आली की मी हे उघड करणार आहे. कारखान्याच्या माध्यमातून शेतकऱ्यांची मुद्दामहून गळचेपी केली जात आहे, असा आरोप कोणाचेही नाव न घेता उदयनराजे भोसले यांनी केला.