الحكومة أعلنت مؤخراً أنها أنفقت خلال عام 2010 ما يقرب من 4 مليار جنيه على مشروعات مياه الشرب، مش كده وبس؛ الحكومة كمان بتقول انها خلال الستة أشهر القادمة ستنفق 3.6 مليار جنيه إضافية .. لكن كثير من الناس مش حاسين بنتيجة المشاريع اللي أنفقت عليها الحكومة المليارات دي، مفيش أي تحسن ملموس في خدمات مياه الشرب، لا من ناحية النظافة -نظافة وريحة وشكل وطعم المياه- ولا من الناحية الفنية زي انقطاع المياه في أماكن كثير لأيام طويلة.
طيب إذا كانت الحكومة صرفت كل المليارات دي، منين عايزين أهالي القرى في الأقاليم يتحملوا تكاليف مشروعات ضخمة علشان يحصلوا على أبسط حقوقهم وهي المياه .. بلاش الأقاليم، كل الفلوس دي راحت فين والمياه بتفضل مقطوعة لأيلم عن أماكن كثير في القاهرة الكبرى؟ ناهيك عن ان الكثير من الأطباء بيرجعوا كثير من الأمراض اللي بيعاني منها المصريين لعدم صلاحية مياه الشرب للاستهلاك الآدمي.
شريهان أبو الحسن تستطلع آراء الناس حول رأيهم في مستوى نظافة مياه الشرب، وهل المياه بتتقطع لفترات طويلة أو لا؟ وهل أحس الناس بتغيير ملموس نتيجة إنفاق هذه المليارات؟