السلام والتحية على حضراتكوا أهلا بيكو معانا كل سنة وانتو وطيبين .. وعام سعيد علينا وعليكو.. وان شاء الله مصر تحقق اللى وماقدرتش تحققه اللى مقدرتش تحققه طوال السنين اللى فاتت قبل الثورة وبعد الثورة.. نتمنى نشوف مصر جديدة فى عام جديد.. مصر مفيهاش احتقان ولا انقسام بعد اللى شوفناه بسبب الدستور الجديد، مصر مفيهاش اتهامات بين ابنائها بالعمالة والكفر زى اللى شوفناه بين القوى المتصارعة على الحكم.. مصر من غير كوارث جديدة زى اللى شوفناها فى حادث قطار أسيوط و استاد بورسعيد.. مصر من غير طوابير زى اللى بنشوفها كل يوم قدام محطات البنزين ومستودعات الأنابيب.. مصر من غير فقر ولا جوع.. مصر الأمن والأمان مش زي اللى بنشوفه كل يوم في حوادث السرقة والاغتصاب والقتل.. من الاخر مصر اللى خرجت عشانها الثورة "مصر العيش .. مصر الحرية.. مصر العدالة الاجتماعية.. مصر الأمن والأمان" يا تري هنشوف مصر الجديدة فى 2013 ،، بس واحنا بنتمنى نشوف مصر أحلى في 2013 لازم نبص بصة على 2012 اللي فعلا سنة غريبة نصها برئيس ونصها من غير رئيس نصها بمجلس شعب ونصها من غير مجلس شعب ، نصها بمجلس عسكري ونصها من غير مجلس عسكري .. عام مقسوم بالأحداث وعام اتقسم فيه المصريين بطريقة محدش كان نفسه فيها ابدا.. عموما تعالوا نروح نشوف الرصد البسيط ده لمصر في 2012 بانقساماته وخلافاته واتهاماته ؟ نشوف 2012 حصل فيه إيه و2013 مخبيلنا إيه .