BDI-ja ka denoncuar 675 votues të Pustecit të cilët janë të regjistruar për të votuar në Ambasadën e Maqedonisë në Tiranë, në kundërshtim me Kodin Zgjedhor. Sipas BDI-së, votuesit nuk plotësojnë kushtin ligjor për votim në diasporë, sepse nuk kanë adresë vendbanimi në Maqedoni. Qëllimi i lejimit për votim të këtyre votuesve, sipas BDI-së, është që shqiptarët të humbin deputetin e Evropës. Madje, zëdhënësi i BDI-së Bujar Osmani akuzoi edhe PDSH-në dhe Gjykatën Administrative se janë bërë pjesë e skenarit për fitoren e VMRO-së në diasporë.

"Në këtë lojë kundër shqiptarëve dhe kundër BDI-së u përfshi herën e kaluar edhe PDSH, ndërsa Gjykata Administrative nuk mori parasysh argumentet ligjore dhe vendosi në mënyrë politike. Ne apelojmë partitë në KSHZ, sidomos PDSH-në, të rreshtohet të paktën një herë me shqiptarët dhe të votojë ankesën e BDI-së, duke u thënë "jo" 675 votuesve maqedonas që kërkojnë të jenë padrejtësisht pjesë e procesit zgjedhor më 27 prill", u shpreh Bujar Osmani, zëdhënës i BDI-së.

BDI-ja edhe disa herë më parë ishte ankuar për votuesit e Pustecit, por KSHZ-ja drejtoi gishtin nga Ministria e Brendshme, si organ përgjegjës për shpërndarjen e letërnjoftimeve. Por Ministrja e Brendshme Gordana Jankullovska deklaronte atëherë se BDI-ja i ka të gjitha mundësitë që betejën për votuesit fiktiv ta zhvillojë në institucione, duke ditur se Ministri i Drejtësisë, Zv/Ministri i Brendshëm dhe Nënkryetari i KSHZ-së janë kuadër të BDI-së. Ndryshe, në njësinë zgjedhore të Evropës janë regjistruar gjithsej 8084 maqedonas për votim, kundrejt 9025 shqiptarëve. Megjithatë rezultatin përfundimtar mund ta ndryshojnë goranët e Kosovës, të regjistruar nën kategorizimin "të tjerë", që janë gjithsej 572. Vendimtarë do të jenë edhe 733 romët dhe 419 turqit, të cilët votojnë për deputetin në Evropë. Benjamin Arifi