http://www.vizionplus.tv
https://facebook.com/VizionPlusTV
https://twitter.com/VizionPlusTV
Kjo është ideja që kanë këta 14-vjeçarët kryeqytetas mbi mjedisin dhe mbrojtjen e tij. Pavarësisht mendimit nëse të rinjtë tanë janë sot pak apo shumë të informuar, ata vetë pohojnë se mjedisi është një nga temat që trajtojnë shpesh në shkollë kohët e fundit. Për këtë arsye, ky publik i vogël është zgjedhur të ulet në poltronat e një salle kinemaje në mënyrë që nëpërmjet filmave të animuar ata të ndërgjegjësohen se çdo të thotë mbrojtje e natyrës. Eventi është pjesë e edicionit të dytë të Festivalit të Filmit Mjedisor, i cili organizohet nga Ministria e Mjedisit dhe Zyra e BE-së në Tiranë. Mbi 40 filma me metrazh të shkurtër nga e gjithë bota, por mes tyre edhe 15 prodhime shqiptare kanë qëllim të flasin nëpërmjet imazheve mbi florën, faunën, ndotjen e ajrit, ngrohjen globale dhe ato çka ne po humbim çdo ditë. Festivali i cili zgjat deri më 24 maj e që shtrihet edhe në Përmet, Vlorë dhe Shkodër do të mbyllet me dhënien e katër çmimeve, mbi prodhimet më të mira që rrëfejnë mjedisin.