TIRANE-Drejtori i Përgjithshëm i Policisë së Shtetit priti në një takim Ambasadorin e OSBE/ODIHR, njëkohësisht dhe Shef i Misionit të Vëzhgimit të Zgjedhjeve në Shqipëri Z.Peter Tejler, i cili shoqërohej nga Zëvëndës Shefi i Misionit Znj. Polyna Lemos dhe Eksperti i Sigurisë Laszlo Belagyi.

Drejtori i Përgjithshëm i Policisë së Shtetit Haki Çako ka njohur Z.Tejler me masat e Policisë së Shtetit për menaxhimin e procesit zgjedhor.

Çako ka theksuar se janë trajnuar të gjithë punonjësit e Policisë që janë të ngarkuar me detyra gjatë procesit zgjedhor.

?Është prodhuar libri i xhepit "Kujtesë për punonjësit e Policisë" me mbështetjen e OSCE-së. Janë ngritur grupet e drejtimit në çdo qark.
Në Drejtorinë e Përgjithshme të Policisë së Shtetit është ngritur grupi i drejtim - komandimit i pajisur me gjithë infrastrukturën dhe bazën logjistike për të marrë, përpunuar dhe përcjellë në kohë reale çdo informacion?, tha Çako duke shtuar se, ështe duke përfunduar programi për menaxhimin e masave të sigurisë gjatë procesit që nga marrja në dorëzim për ruajtjen e qendrave të votimit e deri në përfundim të gjithë procesit , ku çdo punonjës Policie do raportojë online nëpërmjet këtij programi.
Cako informoi më tej ambasadorin se, është caktuar koordinatori me KQZ si dhe koordinatori për informim për partnerët ndërkombëtar.