Tre persona u plagosën në një atentat të ndodhur mëngjesin e kësaj të diele në Vlorë, ndër ta dhe nje femijë 8 vjeç. Ka qenë ora 09:35 minuta kur një breshëri automatiku u derdh mbi një automjet tip ?Mercedes-Benz? me targë VL 6368 C.

Në të gjendeshin Ferdinand Llanaj 39 vjeç dhe Dritan Bega 50 vjeç. Djali 8-vjeçar i Llanajt ndodhej pranë makinës së të atit.

Të paktën 20 plumba janë qëlluar në drejtim të tyre. Sipas policisë autorët dyshohet se kanë qenë dy. Ata i kanë zënë pritë objektivit të tyre me një automjet tjetër tip BMW me targa italiane dhe plumbat kane ardhur nga personi që ka qenë në vendin e pasagjerit.

Besohet se ka pasur një kundërpërgjigje nga njëri prej të plagosurve, pasi në vendin e ngjarjes u gjet një pistoletë e gjakosur.

Autorët janë larguar në drejtim të autostradës Vlorë ? Fier dhe rreth dy orë më pas makina e tyre u gjet e djegur në fshatin Kafaraj të Fierit, poshtë një nënkalimi të rrugës Levan-Tepelenë.

Brenda ishte lënë kallashnikovi me të cilën u krye atentati. Ndërsa gjurmë të tjera vështirë të gjenden pasi makina është e shkrumbuar tërësisht.

Grupi hetimor i ngritur për ngjarjen dyshon se objektivi ka qenë Ferdinand Llanaj. Nuk përjashtohet që bashkë me të te jetë tentuar edhe eliminimi i Dritan Begës.

Pista kryesore ku po hetohet është ajo e hakmarrjes, por në dy drejtime të ndryshme.

E para është ajo e konflikteve e masakrës se Çoles në 2015 ku vëllai i Ferdinand Llanajt, Aleksandri së bashku me miqtë e tij Ani Begaj dhe Bertil Aliaj vranë 3 të rinjtë Akil Hasanaj, Ardi Velaj dhe Albi Limaj.

E lidhur me këtë histori sipas burimeve te policise, është dhe vrasja e biznesmenit Erven Hyseni në sheshin e Flamurit në Vlorë, ku mbeti i vdekur aksidentalisht edhe drejtori i OSHEE në Vlorë Roland Saliu. Erven Hyseni ishte daja i një prej të vrarëve të masakrës së Çoles.

Dinamika e ngjarjes është thuajse e njëjtë. Është përdorur një kallashnikov, një makinë tip BMW dhe më pas mjeti gjendet i djegur në Fier poshtë një mbikalimi, në të dyja rastet.

Pista e dytë është zinxhiri i hakmarrjeve që familja Llanaj ka me familjen Xhaferri në Selenicë, që ka shkaktuar disa të vrarë.

Në vitin 2011 në Selenicë është vrarë babai i të plagosurit Ferdinad Llanaj, Baftjar Llanaj, i cili dyshohej se kishte vrarë dy persona nga familja Xhaferri. Për këtë ngjarje u arrestua Sako Xhaferri, i cili mbeti i plagosur edhe vetë në atentat.

Megjithatë hetuesit nuk përjashtojnë edhe konflikte të tjera të cilat mund të jenë të lidhura me aktivitete të paligjshme.

Tv Klan