Juristi Çlirim Gjata i ftuar në studion e Report Tv thotë se kryeprokurori Adriatik Llalla duhet të qëndrojë në detyrë deri në zgjedhjen e Prokurorit të ri.

Komandimi i një prokurori të ri në vend të Llallës, thotë Gjata do paragjykonte titullarin e organit të akuzës si produkt politik. "Kemi një parlament pluralist por njëngjyrëse, jo me një balancë si deri në 25 qershor. Kjo maxhorancë i ka votat për ta komanduar një prokuror të ri, me forcën e kartonit. Në këtë rast, edhe sikur të ishte njeriu më i ndershëm, do politizohej", thotë Gjata.

Sipas tij, zgjidhje do ishte lënia e Llallës në detyrë deri në krijimin e KLP dhe për rrjedhojë zgjedhjen e prokurorit të ri nga Kuvendi. "Të lihej në detyrë prokurori aktual. Më mirë le të rrijë në detyrë ky, sesa të emërohej një prokurori i ri i komanduar mbi të cilin do binte damka si prokuror politik. Prandaj të rrijë në detyrë një ose dy muaj ky prokuror, derisa të zgjidhet tjetri".