http://www.vizionplus.tv
https://facebook.com/VizionPlusTV
https://twitter.com/VizionPlusTV
Këngën e flamurit e këndojnë të gjithë njëzëri dhe e dinë shumë mirë se është një nga simbolet tona kombëtare. Në shkollat 9-vjeçare dhe në ato të mesme, nxënësit marrin informacionet bazë mbi këto simbole. Por, jo të gjithë kanë njohuri për to si pjesë e identitetit tonë kombëtar. Ajo që bie në sy tek të rinjtë e shkollave është mungesa e dijeve bazë mbi Kushtetutën e shtetit shqiptar ndonëse është pjesë e programeve mësimore. Në vigjilje të festës së Flamurit me iniciativë të Presidentit të Republikës, në disa shkolla të kryeqytetit janë shpërndarë manuale të Kushtetutës. Ajo që duket më e rëndësishme janë burimet se ku mund të informohen të rinjtë mbi Kushtetutën. Për të apasionuarit pas drejtësisë, por edhe nxënësit më të dalluar nisma kishte një rëndësi të veçantë. Këshilltarë të presidentit dhe anëtarë të KLD-së kanë shpjeguar në takimet me brezin e ri konceptet bazë të Kushtetutës, parimet themelore mbi të drejtat dhe detyrimet e të gjitha shtresave shoqërore, zbatimin e ligjit apo ndarjen dhe balancimin e pushteteve.